威震港九 鐵板4金剛

Mon Jun 24 2019 12:30:16 GMT+0800 (香港標準時間)

撰文︰美食旅客

鐵板餐,總係同細個掛上鈎。
牛形鐵板、醬汁濃煙、滋滋咋咋、餐巾遮面。
曾幾何時,我哋就係食呢啲扒長大。
大個咗搵到錢,出去食法國菜意大利餐,才漸漸忘記老朋友。
不過偶然午夜夢迴,總會想起,細個時候冇乜要求,反而少好多煩惱。
於是,又心思思,鋸鐵板。
這就是成長。這就是人生。

巨人T骨牛扒餐,蒜蓉汁一落,即時要用餐巾遮面。

#1 蒜蓉之霸 金鳳大餐廳

半世紀的金鳳大餐廳,門口總是一堆人。
原因?出名抵食兼大件,同埋係好多人嘅牛扒啟蒙,皆因人生第一塊扒,分分鐘喺呢度食。幾十年來,牛扒有進化過,扒類肉食從世界各地入口,甚麼蘇格蘭牛扒德州西冷都有,多好多選擇。巨型的T骨牛扒,我最鍾意,大到伸展出鐵板外,加幾蚊,生蒜茸豪邁鋪到滿。再淋黑椒汁及燒汁,「嗞嗞」聲!仲唔攞餐巾遮住?


鐵板雞扒餐,蒜蓉多到呢。

金鳳大餐廳
地址:太子荔枝角道102號金鳳樓地下
電話:2393 6054

美國安格斯西冷牛扒(森美汁)

#2 醬汁之神 森美餐廳

西環森美餐廳,港島西嘅朋友細細個就識。
坐小巴返屋企,見到隻巨型大鐵牛招牌,就知道快到了。
森美有落!經典。

森美叔叔葉聯以前喺高級西餐廳做,最強係醬汁,森美汁安格斯西冷牛扒,放在牛形鐵板上,5成熟,配薯菜,最好。森美汁幾乎滿瀉,是參考當年洋人廚師的黑椒汁食譜改造出嚟,爆香洋葱、西芹、煙肉、蘑菇等,再加入黑椒碎粒,就煮成香辣惹味的森美汁,掛住這滋味?搭小巴,去西環,森美有落。


餐廳名人照貼足一堵牆,可見地位非凡。

森美餐廳
地址:西環皇后大道西204-206號地下
電話:2548 8400

龍蝦拼肉眼牛扒

#3 配搭之王 花園餐廳

咁多間鐵板西餐廳中,花園餐廳最多分店,旺角觀塘北角太子銅鑼灣尖沙咀……梗有一間喺左近。分店雖多,鐵板扒餐,間間咁上下。花款超多。一般牛扒豬扒雞扒餐外,更有龍蝦拼肉眼牛扒、帶子拼牛扒、海鮮大雜薈等,選擇困難症最怕,心多多最啱。龍蝦拼牛扒,最受歡迎,厚身肉眼扒,鋪在牛頭鐵板上,另一邊放了開邊的龍蝦,仲有雜菜及薯條,豐富到呢!鐵板一上,侍應隨即攞個鐵桶嚟淋汁,咋咋聲一響,又開餐!


牛扒切開粉紅色,七八成熟,最好食。

花園餐廳(旺角店)
地址:旺角山東街38號2樓
電話:2781 1831

西冷牛扒餐

#4 美極牛扒 飛鷹餐廳

鐵板扒店中,飛鷹硬係有啲唔同。
格仔枱布、馬蹄梳化、紅皮餐牌……有陣未拆前hugo’s的況味。

鐵板西冷牛扒餐,都有啲唔同。餐包、餐湯、牛扒、餐茶。餐包好似拳頭咁大,是老闆特別找廠房訂造,羅宋湯及忌廉湯,並非罐頭貨,羅宋湯菜多味道濃郁,忌廉湯順滑配料多,吃得出心機。牛扒建議點五成熟,因放上鐵板,往往燒至七成甚至十成熟,五成熟效果最佳。牛扒有陣獨特醬油味,原來用美極醃過,只此一家。特別一提,廚房出菜時會預先淋上鐵板汁,如想自己親自淋汁,則要在點菜前說明,額外加少少錢便可。


迷離水晶燈,十足王家衛電影。

飛鷹餐廳
地址:深水埗荔枝角道256號
電話:2395 2576


#美食旅客#熱話#飲食#威震港九#鐵板4金剛#鐵板扒店#牛扒#經典#抵食夾大件#香港人回憶

相關文章
不丹 (一):綠油「遊」
朝鮮 (四) : 食、買、玩?!
摩登車仔麵 嘟一嘟 有得食!
朝鮮 (三) : 國民精神
朝鮮 (二):北韓闖關

推介文章
3大母親節心水之選
【《17都市驚喜》選舉】17位候選網紅主播誕生 快啲投票選出心水冠軍
【黃心穎避走美國後】鄭秀文開腔:不回望向前看 梁裕恆再爆:有契弟夾女藝人上房
有氣清酒 你試過未?
【一家三口幸福出巡】已修身幾時全面復出?吳雨霏:睇住囝囝先
【為仔讀書移居英國】 雷頌德返香港Shopping止癮
【傳Sammi搬離愛巢情緒崩潰】馬國明避談有冇分手 替心穎求情:佢知錯
【傳無綫抽起黃心穎劇集】許志安狂喊道歉:我係一個壞咗嘅人
【保重呀】去年踢波昏迷入ICU 余德丞黑眼圈超大殘爆
【發現自己係養子深受打擊】胡渭康感情生活神秘 同壯男試化妝品好窩心
【林峯同34D張馨月傳婚訊】吳千語變迷人Pink Lady晒腿反擊
【《淪落人》聲勢強】奪金像獎影帝呼聲高 黃秋生High Tea心情好
按此閱讀臉書精彩內容

熱爆e+up


載入中…
x